தற்போது பலரும் அடிக்கடி அதிகப்படியான உடல் சோர்வை அனுபவித்து வருகின்றனர். இதற்கு பரபரப்பான வாழ்க்கை முறை, அதிகமான பணிச்சுமை, மன அழுத்தம், போதிய தூக்கமின்மை, சீரற்ற உணவுப் பழக்கம் போன்றவை முக்கிய காரணங்களாகக் கூறப்படுகின்றன.

பொதுவாக இத்தகைய காரணங்களால் ஏற்படும் உடல் சோர்வு, போதுமான ஓய்வு எடுத்த பிறகோ அல்லது வாழ்க்கை முறையில் சிறிய மாற்றங்களை மேற்கொண்ட பிறகோ குறைந்து விடும்.

ஆனால், எவ்வளவு நேரம் ஓய்வெடுத்தாலும் உடல் சோர்வு நீங்காமல் தொடர்ந்து இருந்தால், அதை சாதாரண பிரச்சனையாகக் கருதக் கூடாது.

அது உடலில் மறைந்திருக்கும் தீவிரமான உடல்நலக் கோளாறின் ஆரம்ப அறிகுறியாக இருக்கலாம். குறிப்பாக, அது ஹெபடைடிஸ் (Hepatitis) எனப்படும் கல்லீரல் நோயின் அறிகுறியாகவும் இருக்கக்கூடும்.

ஹெபடைடிஸ் என்பது உடலின் மிகப்பெரிய மற்றும் முக்கியமான உறுப்புகளில் ஒன்றான கல்லீரலில் ஏற்படும் அழற்சி ஆகும். இந்த நோய் ஆரம்ப நிலையில் பெரும்பாலும் வெளிப்படையான அறிகுறிகள் இல்லாமல் அமைதியாக கல்லீரலை பாதிக்கத் தொடங்குகிறது.

இதனால் பலருக்கு நோய் இருப்பதே தெரியாமல் போகும். ஆனால், நோய் தீவிரமடையும் போது கல்லீரல் கடுமையாக சேதமடைந்து பல்வேறு உடல்நலப் பிரச்சனைகளையும் வெளிப்படையான அறிகுறிகளையும் ஏற்படுத்தக்கூடும்.

ஹெபடைடிஸ் குறித்து பொதுமக்களிடம் விழிப்புணர்வை ஏற்படுத்தும் நோக்கில், ஒவ்வொரு ஆண்டும் ஜூலை 28 ஆம் தேதி உலக ஹெபடைடிஸ் தினம் (World Hepatitis Day) அனுசரிக்கப்படுகிறது.

இந்த நாளின் மூலம், நோயை ஆரம்ப நிலையிலேயே கண்டறிவதன் அவசியம், தடுப்பூசி, பரிசோதனை மற்றும் சரியான சிகிச்சையின் முக்கியத்துவம் குறித்து உலகளவில் விழிப்புணர்வு ஏற்படுத்தப்படுகிறது.

எனவே, உலக ஹெபடைடிஸ் தினத்தை முன்னிட்டு, ஒருபோதும் அலட்சியப்படுத்தக் கூடாத ஹெபடைடிஸின்  ஆரம்பகால அறிகுறிகள் குறித்து விரிவாகப் பார்ப்போம்.

முக்கியமான எச்சரிக்கை அறிகுறிகள்

உடல் சோர்வு: போதுமான ஓய்வுக்குப் பிறகும் காரணமின்றி தொடர்ந்து சோர்வாக இருந்தால், அது கல்லீரல் அழற்சியின் அறிகுறியாக இருக்கலாம்.

பசியின்மை: திடீரென உணவின் மீது விருப்பம் குறைவது, ஹெபடைடிஸால் செரிமானம் மற்றும் வளர்சிதை மாற்றம் பாதிக்கப்படுவதால் ஏற்படலாம்.

குமட்டல் மற்றும் வாந்தி: உணவு சாப்பிட்ட பிறகு அடிக்கடி குமட்டல் அல்லது வாந்தி ஏற்பட்டால், கல்லீரல் செயல்பாடு பாதிக்கப்பட்டிருக்கலாம்.

அடர் நிற சிறுநீர்: போதுமான தண்ணீர் குடித்தும் சிறுநீர் அடர் நிறத்தில் இருந்தாலோ, கண்கள் மற்றும் தோல் மஞ்சள் நிறமாக மாறினாலோ, உடனடியாக மருத்துவரை அணுக வேண்டும்.

வலது மேல் வயிற்று வலி: வலது விலா எலும்புக்குக் கீழே தொடர்ந்து வலி அல்லது அசௌகரியம் இருந்தால், அது கல்லீரல் அழற்சியின் அறிகுறியாக இருக்கலாம்.

சரும அரிப்பு: காரணமின்றி, குறிப்பாக இரவு நேரங்களில் அதிகமாக சரும அரிப்பு ஏற்பட்டால், அது கல்லீரல் பிரச்சினையைக் குறிக்கலாம்.

காய்ச்சல் மற்றும் உடல்வலி: லேசான காய்ச்சல், தசை வலி, தலைவலி மற்றும் உடல் சோர்வு போன்றவை ஆரம்பகால வைரஸ் ஹெபடைடிஸின் அறிகுறிகளாக இருக்கலாம்.

எளிதில் இரத்தக்கசிவு அல்லது காயம்: அடிக்கடி சிராய்ப்பு, ஈறுகளில் இரத்தக்கசிவு போன்றவை ஏற்பட்டால், கல்லீரல் இரத்தம் உறைய தேவையான புரதங்களை போதுமான அளவில் உற்பத்தி செய்யாததன் அறிகுறியாக இருக்கலாம். மேற்கூறிய அறிகுறிகள் இருந்தால் அதனை அலட்சியப்படுத்தாது அவசியம் முறையாக மருத்து பரிசோதனை மேற்கொள்ள வேண்டியது அவசியம்.

யாருக்கெல்லாம் ஹெபடைடிஸ் வருவதற்கான அபாயம் அதிகம்?

 பாதுகாப்பற்ற பாலியல் தொடர்பில் ஈடுபடுபவர்கள்.

அளவுக்கு அதிகமாக மது அருந்துபவர்கள்.

உடல் பருமன் அல்லது கொழுப்பு கல்லீரல் (Fatty Liver) நோய் உள்ளவர்கள்.

ஊசிகள் அல்லது சிரிஞ்சுகளை மற்றவர்களுடன் பகிர்ந்து பயன்படுத்துபவர்கள்.

சுகாதார வசதிகள் குறைவாக உள்ள பகுதிகளுக்குப்  அடிக்கடி பயணம் செய்பவர்கள்.

ஹெபடைடிஸ் தொற்று உள்ளவரின் இரத்தம் அல்லது உடல் திரவங்களுடன் பாதுகாப்பின்றி தொடர்பு கொள்பவர்கள். ஆகியோருக்கு ஹெபடைடிஸ் வருவதற்கான வாய்ப்பு சற்று அதிகம்.