விமல் நடித்த `கன்னிராசி' படத்தை இயக்கிய முத்துகுமரன், யோகிபாபுவை வைத்து ‘தர்ம பிரபு’ என்ற முழுநீள நகைச்சுவை படத்தை இயக்கினார். இத்திரைப்படத்தில் யோகி பாபு எமனாக நடித்திருந்தார். கடந்த ஆண்டு வெளியான இத்திரைப்படம் ரசிகர்களிடையே வரவேற்பைப் பெற்றது. இந்தப் படத்தை அடுத்து முத்துகுமரன் இயக்கத்தில் உருவாகும் அடுத்த படம் குறித்த அறிவிப்பு தீபாவளியன்று வெளியிடப்பட்டுள்ளது.

இந்தர் குமார் தயாரிக்கும் இந்தப் படத்தில் நடிகர் சிவா நாயகனாக நடிக்கிறார். அவருடன் யோகி பாபுவும் முக்கிய கதாபாத்திரத்தில் நடிக்கிறார். ‘சலூன்’ என டைட்டில் வைக்கப்பட்டிருக்கும் இந்தப் படத்துக்கு சாம் சி.எஸ் இசையமைக்கிறார். மணிகண்டன் ஒளிப்பதிவு செய்கிறார். படத்தில் நடிக்கும் மற்ற நடிகர்கள் குறித்த அறிவிப்பு விரைவில் வெளியாகும் என்று எதிர்பார்க்கப்படுகிறது.


இந்தப் படத்தின் போஸ்டரைப் பார்க்கும் போது சலூன் கடைகளில் நடக்கும் நகைச்சுவையை மையப்படுத்தி கதை உருவாக்கப்பட்டிருப்பதாக தெரிகிறது. மேலும் இத்திரைப்படத்தில் நடிகர் சிவா - யோகி பாபு இணைந்திருப்பதால் காமெடிக்கு பஞ்சமிருக்காது என்றும் நம்பலாம். மேலும் இருவரும்  இணைந்து நடிப்பதால் படம் மீதான எதிர்பார்ப்பு ரசிகர்களிடம் ஏற்பட்டுள்ளது.


யோகி பாபு நகைச்சுவை நடிகராக நடித்திருந்த  ‘நாங்க ரொம்ப பிஸி’ திரைப்படம் தீபாவளியன்று பிரத்யேகமாக சன் டிவியில் ஒளிபரப்பு செய்யப்பட்டது. திரையரங்குக்குச் செல்லாத இத்திரைப்படம் ரசிகர்களிடையே நல்ல வரவேற்பைப் பெற்றிருந்ததும் குறிப்பிடத்தக்கது.